خطوبة فتاة.......ولكن!!!!

بسم الله الرحمن الرحيم

السلام عليكم ...إجازة سعيدة...ومبروك على النشاط الجميل في المنتدى الأيام دي....ويارب ديما.
ندخل في الموضوع ...قريت كتير على النت قصة نادرة شوية ...بتقول كان في بنت تقدم إلى خطبتها احد الشباب , وعندما أراد والدها أن يسأل عنه أولا ..رفضت
الفتاة وقالت لوالدها أنها لديها الطريقة المناسبة التي من خلالها تستطيع أن تحكم عليه
وطلبت من والدها أن يدعو ذلك الشاب إلى زيارتهم في منزلهم , وعندما حضر الشاب , طلبت الفتاه من أخيها أن يحضر موبيل هذا الشاب , وبعد أن أخذته
وتصفحت فيه , أخبرت والدها أنها توصلت إلى القرار السليم ورفضت أن
تتم خطبتها إلى ذلك الشاب , وعندما سألها والدها عن السبب أجابت أنها رفضته لما
وجدت في هاتفه من صور وفيديوهات تافهة وغير هادفة بلا قيمة وخليعة...فحكمت تلك الفتاه
على شخصيته مما رأته في هاتفه المحمول....

*والآن أحب أن أوجه سؤالي إلي فتيات المنتدى , هل قرار تلك الفتاه سليم وأساسه قوي؟؟ وهل لو أنتي في مكانها كنتي أخذت نفس قرارها؟؟

• وأحب أوجه سؤال أخر ولكن إلي شباب المنتدى, هل فعلا ما تحمله هواتفكم المحمولة دليل على الشخصية والأخلاق ويمكن أن نحكم من خلالها على شخصية صاحبه؟؟
منتظرة أن تشاركوني بآرائكن وبآرائكم.....شكرا لكن وشكرا لكم.

شكرا يا سهر على الموضوع الجميل ده...وانك فتحتي باب النقاش
بالنسبة لرايي: انا شايفة ان دي عمرها ما كانت طريقة للحكم على شخص ، مش شويه صور وفيديوهات الي هحكم بيها على حد،، هي ممكن تمثل جانب من جوانب الحكم عليه بس مش كله.... كان لازم كمان تقعد معاه وتفهم شخصيته وكمان والدها يسال عنه عشان يعرف سمعته بين الناس.... وبعدها تاخد القرار السليم..

ده رأيي المتواضع ولما نشوف باقي الاراء...

اولا موضوع جميل يا سهر...ثانيا الطريقه بتاعه الموبيل ممكن تكون طريقه كويسه ان الواحد ياخد انطباع عن الشخص بس مش شرط انه يكون شخص وحش علشان شويه حاجات على الموبيل و ممكن نلاقيها عند اى حد ...بس الاهم من كده ان الشخص ده سلوكه ايه و تعاملاته مع الناس ازاى ...و على فكره اليومين دول الشباب فاضى و بقى يهتم بالتفاهات سواء بنات او اولاد و اى حاجه بتصدر عن الانسان عنوان لشخصيته و دليل على جوهره ...بس بصراحه انا عن نفسى والله والله كل ما ابص حواليه اشعر بخيبه امل و احس ان الدنيا بقى مفهاش خير غير قليل ...ربنا يتوالانا ف الايام الجايه فعلا ..و الله الواحد كره يمشى ف الشارع من كتر التفاهات و البدع اللى بنشوفها..

طاب واحد زي انا مثلا معندهوش كارت ميموري...او بمعني اصح الكارت بتاعي فاضي خالص...ومفهوش حاجة غير رنة للموبايل.تقريبا. وصور اخويا...
ابقي علي كده انا انسان فاضي !!!!!

واساسا انا عامل lock code ولو حد اخد الموبايل بتاعي مش حيعرف يفتحه...هههه

((((((((اغرب موضوع اتناقشت فيه هذا الاسبوع ع الاطلاق)))))

i think what she did not right 100%
but it show abad behaviour to that man
but today almost all men have these bad things on their mobiles
but if i were she i will not dare to do that

بصراحة اي واحدة ما اعتقدش انها ممكن تفكر في انها تعمل كدة....يعني ازاي تاخد موبيل واحد شاب وتقلب فيه قال عشان تاخد القرار السليم !!!!!!.....والله اعتقد
اللي مفروض يحصل في الحالة دي ان والدها يسأل عليه واذا اتفقوا الناس ع اخلاقه وحسن سيره يأتي دورها انها تقعد معاه وتشوف نفسها مرتاحة معاه ولا لأ.وياما شباب بتبقي ليه نزوات لكن بمجرد انه يحس انه عايز الاستقرار ويلقي الانسانة اللي ارتاح لها بتنتهي كل حاجة كانت قبل كده وبيبقي احسن من الناس الكويسة..وحكاية الافلام دى ممكن تلفت نظره ليها في فترة الخطوبة مثلا لقيت استجابة وحست انه فعلا بعد عنها خلاص كده تمام لقيت مفيش استجابة ممكن تاخد خطوة مثلا وهي وشطارتها

شكرا لتفاعلكم السريع مع الموضوع......بس يا جماعة ليه مفيش حد اخد باله من كلمة (خليعه , تافهه) ف الموضوع....
فعلا يا روزيت انتي وونتر انه ده مش حكم اساسه قوي اللى حد ما....بس لما توصل الى حاجات لا تتفق مع الذوق والادب العام ...يبقى البنت دي اكيد محقه.....وليه الشاب ده بيحتفظ بيها على موبيله اصلا؟؟؟...وبجد يا ونتر عندك حق في الشارع القنائي الايام دي , الواحد بقى مش عارف يمشي خطوتين على بعضهم.

الموضوع مش غريب قوي يعني ياdr.dala3 ,والمقصود هنا الموبيل اللي فيه صور وفيديوهات مش الموبيل الفاضي....طبعا طبعا الموبيل الفاضي عمره ما يكون دليل على فراغ صاحبه....الموبيل اصلا وسيلة اتصال ليس
اكثر.

فعلا يا ستايل ويا برنسيس دي جراءة زياده حبتين....بس على ما اعتقد انها مجرد قصه والله اعلم مدى صحتها
انا بس حبيت افتح بيها باب النقاش.

اكيد الموبايل في الاساس ماهوالا وسيلة اتصال
وفي ناس بتحب انها تحتفظ فيه بحاجات اخرى
وفي ناس ما بتحبش

عادة الفرد لا يحتفظ بشئ الا وكان بيعجبه او بيحبه
او حاجة حابب انه كل فترة يشوفها
فدا بيعكس جزء مهم من شخصيته

ومن الممكن انها تعتبر الخيط الاول في الحكم على الشخصية
ولكنه ليس بالنهائي
دا طبعا على حسب درجة سوء الحاجات اللي حاططها

رغم ان الموبايل دا حاجة شخصية الى حد ما

انا شايفة ان الموبايل وسيلة اتصال ليس الا كون ان هذا الشاب محتفظ بحاجات خليعة فى الموبايل يبقى هو حابب الحاجات دى لان عمره ما يتحفظ بالحاجات دى وهو مش عايزها .
بس الحكم عليه كان قاسى من هذه الفتاة لان الشباب عادة فى هذه المرحلة بيكونوا طايشين (طيش الشباب )
يعنى الحل ممكن كان فى السؤال عن هذا الشاب ومعرفة خلقه وطبائعهوبالتالى يستطاع الحكم عليه.

أنا رأي أن اللي عملته نوع من الفصاحة ورجاحة العقل
ودي وسيلة أولية لتحديد شخصيته لأن الجواب بيبان من عنوانه
مش معقول هو حاطط حجات تافه وخليعة على موبايله وهو أنسان محترم وعاقل
طب على الأقل لو عنديه نوع من الحكمة ميديش الموبايل لطفل وهو عليه الحجات ديه
بس للأسف ياعيني البنت دي حتعاني لغاية متلاقي المحترم بس سعتها ماأسعد بقية حياتها
(فأظفر بذات الدين تربت يداك)

اللى عملته ده طبعا شىء غلط جدا لان الانسان مستحيل يبنى الحكم علي انسان تانى من خلال اى حاجة غير معرفته بيه معرفة جامدة على حقيقته ويعيش معاه على الاقل كام موقف من المواقف الانسانية والدينية وكمان الدنيوية لانه ممكن يكون مش كويس فى جانب من التلات جوانب دى
وبكده تكون العلاقة بينهم مجرد غش فى غش

» الاسد يمرض ولكن ابدا لن يموت...وكل قارات واحنا طيبين